1ܩܲܫܝܼܫܵܐ ܠܓܘܼܒܝܼܬܵܐ ܚܵܢܝܼܡ ܘܠܒܢ̈ܘܢܘܼܗ̇؛ ܐܵܢܝܼ ܕܐܵܢܵܐ ܡܲܚܘܼܒܹܐ ܝ݇ܘܸܢ ܒܣܲܪܲܣܬܘܼܬܵܐ؛ ܘܠܵܐ ܐܵܢܵܐ ܗܲܪ؛ ܐܸܠܵܐ ܟܠܵܝܗܝ ܐܵܢܝܼ ܕܝܵܕܥܝܼ ܠܣܲܪܲܣܬܘܼܬܵܐ؛ 2ܒܚܵܬܸܪ ܕܣܲܪܲܣܬܘܼܬܵܐ؛ ܗ̇ܝ ܕܥܲܪܩܘܼܠܹܐ ܝ݇ܠܵܗ̇ ܒܝܼܲܢ ܘܥܲܡܲܢ ܒܸܬ ܗܵܘܝܵܐ ܠܥܵܠܲܡ. 3ܒܸܬ ܗܵܘܝܵܐ ܥܲܡܲܢ ܫܵܦܵܩܲܬ؛ ܘܪ̈ܲܚܡܹܐ؛ ܘܫܠܵܡܵܐ؛ ܡ̣ܢ ܐܲܠܵܗܵܐ ܒܵܒܵܐ؛ ܘܡ̣ܢ ܝܼܫܘܿܥ ܡܫܝܼܚܵܐ ܒܪܘܿܢܹܗ ܕܒܵܒܵܐ؛ ܒܣܲܪܲܣܬܘܼܬܵܐ ܘܒܚܘܼܒܵܐ. 4ܚܕܹܐܠܝܼ ܪܵܒܵܐ ܕܡܘܼܫ݇ܟ̰ܸܚܠܝܼ ܡ̣ܢ ܒܢܘܿܢܵܟܼ̈ܝ ܒܸܚܕܵܪܵܐ ܒܣܲܪܲܣܬܘܼܬܵܐ؛ ܕܵܐܟܼܝܼ ܕܦܘܼܩܕܵܢܵܐ ܩܘܼܒܸܠܲܢ ܡ̣ܢ ܒܵܒܵܐ. 5ܘܐܵܕܝܼܵܐ ܦܲܪܦܘܼܠܹܐ ܝ݇ܘܸܢ ܒܝܼܵܟܼܝ ܚܵܢܝܼܡ؛ ܠܵܐ ܐܲܝܟܼ ܕܦܘܼܩܕܵܢܵܐ ܚܵܕ݇ܬܵܐ ܒܸܟܬܵܒܼܵܐ ܝ݇ܘܸܢ ܐܸܠܵܟܼܝ؛ ܐܸܠܵܐ ܗ̇ܘ ܕܐܝܼܬ ܗَܘܵܐ ܠܲܢ ܡ̣ܢ ܫܘܼܪܵܝܵܐ؛ ܕܡܲܚܒܲܚ ܚܲܕ݇ ܠܗ̇ܘ ܐ݇ܚܹܪ݇ܢܵܐ. 6ܘܐܵܗܵܐ ܝ݇ܠܹܗ ܚܘܼܒܵܐ؛ ܕܚܵܕܪܲܚ ܐܲܝܟܼ ܦܘܼܩܕܵܢ̈ܘܼܗܝ. ܐܵܗܵܐ ܦܘܼܩܕܵܢܵܐ ܝ݇ܠܹܗ ܕܵܐܟܼܝ ܕܫܡܸܥܠܵܘܟܼܘܿܢ ܡ̣ܢ ܫܘܼܪܵܝܵܐ؛ ܕܒܝܼܹܗ ܗܵܘܹܝܬܘܿܢ ܒܸܚܕܵܪܵܐ. 7ܣܵܒܵܒ ܪܵܒܵܐ ܡܲܚܠܸܛܵܢܹ̈ܐ ܥܒܼܸܪܗ݇ܘܿܢ ܒܥܵܠܡܵܐ؛ ܐܵܢܝܼ ܕܠܹܐ ܝ݇ܢܵܐ ܡܵܘܕܘܿܝܹܐ ܕܝܼܫܘܿܥ ܡܫܝܼܚܵܐ ܐܵܬܝܵܢܵܐ ܝ݇ܠܹܗ ܒܒܸܣܪܵܐ. ܐܵܗܵܐ ܝ݇ܠܹܗ ܡܲܚܠܸܛܵܢܵܐ ܘܐܢܛܝܼܟܪܝܼܣܛܘܿܣ. 8ܗ݇ܘܹܝܡܘܿܢ ܗܸܫܝܲܪ ܒܓܵܢܵܘܟܼܘܿܢ؛ ܕܠܵܐ ܬܵܠܩܝܼܬܘܿܢ ܡܸܢܕܝܼ ܕܦܠܸܚܠܵܘܟܼܘܿܢ؛ ܐܸܠܵܐ ܗܵܩܵܐ ܬܲܡܲܡ ܦܵܝܫܝܼܬܘܿܢ ܦܸܪܥܝܹܐ. 9ܟܠ ܡ̇ܢ ܕܥܵܒܼܸܪ ܠܵܩܵܕ݇ܡܵܐ ܘܠܵܐ ܥܲܪܩܸܠ ܒܝܘܼܠܦܵܢܹܗ ܕܡܫܝܼܚܵܐ؛ ܐܲܠܵܗܵܐ ܠܲܝܬ ܠܹܗ. ܘܗ̇ܘ ܕܥܲܪܩܸܠ ܒܝܘܼܠܦܵܢܹܗ ܕܡܫܝܼܚܵܐ؛ ܐܵܗܵܐ ܐܘܼܦ ܠܒܵܒܵܐ ܘܐܘܼܦ ܠܒܪܘܿܢܵܐ ܐܝܼܬ ܠܹܗ. 10ܐܸܢ ܐ݇ܢܵܫܵܐ ܐܵܬܹܐ ܠܟܸܣܠܵܘܟܼܘܿܢ؛ ܘܐܵܗܵܐ ܝܘܼܠܦܵܢܵܐ ܠܵܐ ܡܲܝܬ݇ܝܹܐ؛ ܠܵܐ ܩܵܒ̇ܠܝܼܬܘܿܢ ܠܹܗ ܓܵܘ ܒܲܝܬܵܐ؛ ܘܠܵܐ ܕܪܹܡܘܿܢ ܫܠܵܡܵܐ ܐܸܠܹܗ. 11ܣܵܒܵܒ ܗ̇ܘ ܕܕܵܪܹܐ ܫܠܵܡܵܐ ܐܸܠܹܗ؛ ܫܲܪܘܼܟܹܐ ܝ݇ܠܹܗ ܒܦܘܼܠܚܵܢ̈ܘܼܗܝ ܒܝܼܫܹ̈ܐ. 12ܟܲܕ ܪܵܒܵܐ ܡܸܢܕܝܼܵܢܹ̈ܐ ܐܝܼܬ ܗَܘܵܘ ܠܝܼ ܠܸܟܬܵܒܼܵܐ ܐܸܠܵܘܟܼܘܿܢ؛ ܠܵܐ ܒܥܹܐܠܝܼ ܕܒܝܼܲܕ ܘܵܪܵܩܵܐ ܘܒܸܕܝܘܼܬܵܐ؛ ܐܸܠܵܐ ܒܗܹܒܼܝܼ ܝ݇ܘܸܢ ܕܐܵܬܸܢ ܠܟܸܣܠܵܘܟܼܘܿܢ؛ ܘܦܘܼܡܵܐ ܠܟܸܣ ܦܘܼܡܵܐ ܗܲܡܙܸܡܲܚ؛ ܕܚܲܕܘܼܬܵܐ ܕܝܼܲܢ ܗܵܘܝܵܐ ܬܘܼܡܸܡܬܵܐ. 13ܒܝܼܵܗ݇ܒܼܵܐ ܝ݇ܢܵܐ ܫܠܵܡܵܐ ܐܸܠܵܟܼܝ ܒܢܘܿܢܹ̈ܐ ܕܚܵܬܵܟܼܝ ܓܘܼܒܝܼܬܵܐ.